حکومت کا عمران خان کی نااہلی اور پی ٹی آئی پر پابندی کی رٹ دائر کرنے کا فیصلہ

اسلام آباد : حکومت نے فنڈنگ کیس میں الیکشن کمیشن کے فیصلے پر سپریم کورٹ جانے کا فیصلہ کرلیا ،عمران خان کی نا اہلی اور پی ٹی آئی پر پابندی کی رٹ دائر کی جائے گی۔

تفصیلات کے مطابق وزیراعظم شہباز شریف کی زیر صدارت اعلی سطحی اجلاس ہوا، جس میں الیکشن کمیشن فیصلہ پر قانونی ٹیم نے وزیراعظم کو تفصیلی بریفنگ دی۔

ذرائع نے بتایا کہ حکومت نے الیکشن کمیشن کے فیصلے پر سپریم کورٹ جانے کا فیصلہ کر لیا، عمران خان کی نا اہلی اور پی ٹی آئی پر پابندی کی رٹ دائر کی جائے گی۔

ذرائع کے مطابق اجلاس میں حکومتی اتحادیوں کو بھی اعتماد میں لینے کا فیصلہ کیا گیا اور وزارت قانون کو ہدایت کی گئی ہے کہ فوری رٹ تیار کی جائے۔

زرائع کا کہنا ہے کہ ایک سے دو روز میں عمران خان کی نا اہلی اور پی ٹی آئی پر پابندی کی رٹ سپریم کورٹ میں دائر کر دی جائے گی۔

گذشتہ روز وزیراعظم شہباز شریف کی سربراہی میں حکمراں اتحاد پی ڈی ایم کا سربراہی اجلاس ہوا تھا ، جس میں پی ٹی آئی کیخلاف سیاسی اور قانونی محاذ پر سخت فیصلے کرنے پر اتفاق ہوا۔

وزیراعظم ہاؤس میں اتحادی جماعتوں اورپی ڈی ایم کے سربراہی اجلاس میں وزیر قانون اعظم نذیرتارڑ نے پی ٹی آئی فنڈنگ کیس کے فیصلے پر بریفنگ دی۔

سیاسی اورقانونی کمیٹیاں تشکیل دی گئیں، قانونی کمیٹی الیکشن کمیشن کے فیصلے پر پی ٹی آئی کیخلاف کاروائی تجویز کرے گی، سیاسی کمیٹی سیاسی محاذپراقدامات تجویزکرے گی، قانونی کمیٹی کی رائے پرکابینہ سےمنظوری لی جائے گی۔

خورشید شاہ کو سیاسی کمیٹی جبکہ اعظم نذیرتارڑکو قانونی کمیٹی کا سربراہ بنایا گیا ہے۔

اپنا تبصرہ بھیجیں